Fuel subsidy sa mga tricycle driver sa Talisay gipaabot nga matapos on time

Karong petsa 15 sa bulan sa Agusto ang lugway sa pag-apod-apod sa 150 pesos nga fuel subsidy sa mga tricycle driver sa Dakbayan sa Talisay.

Matud sa City Treasurer sa Talisay Emma Macuto miabot na sa 500 ka mga tricycle operator ang nakakuha sa benipisyo.

Dunay 1,746 ka mga rehistradong tricycle sa Siyudad.

Matud ni Macuto nga sa gidaghanon sa mga tricycle operator nga mikuha sa pantawid pasada matag-adlaw malaumon siyang makuha gyud ang tanan sa gikatakdang panahon.

Matud ni Macuto nga gawas lang sa mga nadungog nga bagolbol walay tricycle driver nga pormal nga mireklamo nga wala hatagi sa 150 sa iyang operator.  (Marlon Bellita)

Kamatayon sa usa ka Negosyante susihon kon wala bay foul play

Mahibaw-an karong adlawa pinaagi sa autopsy kon wala bay foul play ang kamatayon sa usa ka Willy uy nga napalgang patay sa Camella Homes sa Siyudad sa Talisay.

Ang 56 anyos nga negosyante nakit-an na lang nga nagbuy-od sulod sa pansayan sa balay nga iyang gipuy-an.

Ang higala niini nga usa ka Liza Empleo nga taga Siyudad sa Sugbo maoy nakadiskobre sa iyang patayng lawas uban sa kapolisan sa Talisay pasado alas 4 sa hapon.

Si Empleo nangayo og pakitabang sa kapolisan dihang wala na motobag sa text ug tawag sa cellphone ang negosyante.

Giatake na makaduha ka higayon matud pa si uy.

Hangtod karon wala pay mga tagtongod sa namatay nga mipatim-aw sa buhatan sa kapolisan.  (Marlon Bellita)

Talisay City disidido nang mosira sa karaang merkado sa Tabunok

Hukamanan na lang ang mahimong makapugong sa lakang sa Dakbayan sa Talisay pagbalhin sa operasyon sa merkado sa Tabunok ngadto sa  bag-ong merkado sa Lagtang.

Human matud pa ni Talisay City Administrator Ritchel Bacaltos nga ila nang gitubag ang mga demanda sa mga apektadong vendors.

Kon wala nay laing mga kakulian ang petsa sa pagbalhin gikatakda na karong Agusto 23 ngadto sa Agusto 28.

Nagpasabot ni nga sa petsado 29 sirado na ang operasyon sa merkado apil na ang terminal sa mga tricycle.

Subling gipahibalo ni Bacalos nga way lakang ang Siyudad pagamit og pwersa sa pagbalhin.

Apan giklaro sa opisyal nga taliwa sa pabilin pang isyu sa mga misupak nga vendors sa lakang dili na kapugngan ang desisyon sa Dakbayan.  (Marlon Bellita)

Talisay City Hall duna nay complaint box

Gihulagway nga positibo ang reaksiyon sa mga magbubuhis sa Dakbayan sa Talisay sa information desk ug complaint box nga gibutang sa Talisay City hall.

Ang administrador sa Siyudad Ritchel Bacaltos mibutyag nga ang paghatag og kasayon sa mga magbubuhis sa bisan unsa nilang katoyoan ang tumong sa maong lakang.

Gawas sa complaint form duna say porma alang sa mga sugyot, rekomendasyon ug pagdayeg.

Kinahanglan gyud hinoon nga ibutang ang ngalan sa hingtungdan nagreklamo aron dili kalikayan nga mabinoangan ang usa ka departamento o mga kawani.

Matag semana susihon ang tanang mga porma aron mahisgutan atol sa department heads meeting matag lunes ang tanang isyu.

Tumong sad sa lakang ang pagpakita sa mga kawani nga seryoso ang administrasyon pagsunod sa mga kalihokan sa matag buhatan. (Marlon Bellita)