Rollback sa Presyo sa Lana

Mupatuman sa us-us sa presyo sa mga produkto sa lana ang tulo ka higanteng kompanya.   Nipahibaw sa rollback mao ang Petron, Shell ug Chevron (Caltex) nga karong tungang gabie magsugod laslas sa presyo.   P2 ang laslas matag litro sa diesel ug kerosene, P1.25 sa regular gasoline ug P1.75 sa unleaded ug premium gasoline.  (RC Dalaguit)

Gatusan Ni-donar og Dugo

Nakahipos og 136 ka mga bags sa dugo ang Chong Hua Hospital atol sa gipahigayon nga Kapamilya Blood Donation Campaign.   Gibutyag ni Dr. Erick Lasala sa Chong Hua hospital nga way sakit ang ilang pamaagi sa pagkuha og dugo gikan sa mga donors.  (RC Dalaguit)

Heroes welcome nisugat ni Manny Pacquiao sa iyang pagbalik karong adlawa sa nasud.

Gisugat ug usa ka Heroes welcome si pound for pound king Manny Pacquiao sa iyang paghibalik dinhi sa nasud karong kadlawn.   Sa pagtugpa ni Manny Pacquiao sa Ninoy Aquino International Airport (NAIA) kaganinang kadlawn gisugat siya sa nagdahunog nga abiba sa mga boxing fans nga pulos nagsul ob ug yellow nga sapot.   Gikan sa NAIA si Pacquiao nidiritso sa Makati City Hotel aron makapahimutang sa iyang mga bagahe ug dayon niatubang sa mga sakop sa media.   Sa interview sa mother station DZMM si Pacquiao mapasalamaton sa tanan nga mga pinoy nga nisuporta ug nangaliya alang kaniya sa iyang sangka batok ni Sugar Shane Mosley.   Gikataw-an lang sa boxing superstar ang pong sa nakulatahan nga si Mosley nga siya naggamit ug steroids hinungdan nga kusgan ug paspas siya sa ibabaw sa ring.   Matod ni Pacquiao nga wa siyay problema kon si Juan Manuel Marquez ang iyang sunod nga ikasinukliay ug kumo apan mag-agad ang tanan sa hukom sa iyang promoter nga si Bob Arum.   Suma pa ni Pacquiao nga di una siya maghuna-huna ug boxing karong higayona sanglit iyang pangandaman ang engrande nga birthday party sa iyang pinanggang inahan nga si Dionisia.   ( Najib M. Cubio )

Pulis ug mga batan-on nagpinusilay sa lungsod sa Sibonga 3 angol.

GIPAUBOS NA SA CAMP RESTRICTION ANG SAKOP SA REG'L. PUBLIC SAFETY BATALLION NGA NAKIGPINUSILAY SA MGA BATAN ON SA SIBONGA UG NIANGOL SA 3 KA MGA MAMAYLIHAY. SI PO2 ELRAY BRADY KINSA SAKOP SA REG'L. PUBLIC SAFETY BATALLION NGA NAGBASI SA LUNGSOD SA SIBONGA ANG NAKIGSINUKLIAY UG BALA NGADTO SA MGA BATAN ON ATOL SA GIPAHIGAYON NGA BAYLI SA BRGY. KANDAGIT, SIBONGA ALA UNA BAYNTE GANINANG KADLAWN. ANG PAGSINUKLIAY UG BALA NIRESULTA SA PAGKAANGOL SA LAING MGA BATAN ON NGA NAGSAYAW SUD SA BAYLIHAN NGA SILA SI JAYPARD SARDA 25, RICKY LLANOS 37 UG ANG USA KA 13 ANYOS NGA BATANG LALAKE. ANG TULO KA MGA SAMARAN ANG DALING GIDALA SA TAMBALANAN. SUMA SA IMBISTIGADOR SA KAPULISAN SA SIBONGA PINAAGE NI P03 ANTONIO SANCHEZ, NGA ANG PULIS NGA SI PO2 BRADY NITUBAG SA ALARMA SA KAGULIYANG SA GRUPO SA MGA BATAN ON SUD SA BAYLIHAN. GIDUGANG PA NI PO3 SANCHEZ NGA GIUNHAN SA PAGPUSIL SI PO2 BRADY APAN WA SIYA MAIGO HINUNGDAN NGA SIYA NIBAWS SA PAGPUSIL NGADTO SA MGA BATAN ON NGA NIUNA SA PAGPUSIL KANIYA UG WA USAB SIYA MAKAIGO KANILA. ANG SINUKLIAY UG BALA SA PULIS UG SA MGA BATAN ON NAKAPAGAN SA 3 KA MGA MAMAYLIHAY.

Girelibohan nga hepe sa kapulisan sa Compostela andam mutuman sa hepe sa CPPO.

ANDAM NGA DAWATON SA HEPE SA KAPULISAN SA LUNGSOD SA COMPOSTELA KON ASA SIYA ILABAY HUMAN NGA NAKAHUKOM ANG HEPE KAPULISAN SA PROBINSYA SA SUGBO NGA HULIPAN SIYA SA IYANG PWESTO. ANG PANGU SA KAPULISAN SA PROBINSYA SA SUGBO P/SR. SUPT. PATROCENIO COMENDADOR JR. WA MATAGBAW SA PAGPASABOT NI P/SR. INSP. RODRIGO GIANGAN LABOT SA NAHITABO NGA PAGTAKEOVER SA MGA DUMADAPIG NI MAYORALTY CANDIDATE JOEL QUINO SA MUNISIPYO SA LUNGSOD SA COMPOSTELA NIADTONG MERKULES. SUMA PA NI P/SR. INSP. RODRIGO GIANGAN NGA ISIP USA KA SULONDON NGA PULIS ANDAM NIYANG DAWATON ANG BISAN UNSA NGA ASSIGNMENT NGA IHATAG KANIYA HUMAN NGA SIYA MAHULIPAN SA IYANG PWESTO ISIP HEPE SA KAPULISAN SA COMPOSTELA. GIKLARO NI SR. INSP. GIANGAN NGA MUTUMAN SIYA SA BISAN UNSA NGA KAMANDOAN GIKAN SA IYANG MGA LABAW. GITATAW HINOON NI SR. INSP. GIANGAN NGA SA IYANG PAGDUMA SA COMPOSTELA PULIS STATION WA SIYA MAGPABAYA SA IYANG KATUNGDANAN, APAN NAHITABO LAMANG NGA NALUTSAN SILA SA MGA DUMADAPIG NI MAYORALTY CANDIDATE JOEL QUINO NIADTONG MERKULES SANGLIT WA NILA DAMHA NGA HIMOON KADTO SA IYANG MGA SUPORTER.

Kapamilya blood donation campaign sa Chong Hua Hospital nagpadayon karong orasa.

NAGPADAYON KARON ANG LAING HUGNA SA KAPAMILYA BLOOD DONATION CAMPAIGN SA CHONG HUA HOSPITAL SUGOD SAYO KARONG BUNTAG. ANG KADAGKOAN SA CHONG HUA HOSPITAL NIPASALIG SA MGA KAPAMILYA BLOOD DONORS NGA WAY SAKIT ANG PAGKUHA NILA SA DUGO. GIDAPIT ANG MGA KAPAMILYA NGA WAY KABILINGGAN SA ILANG PANGLAWAS NGA MUDONAR UG DUGO ARON NGA MAKATABANG SA MGA KAPAMILYA NGA NANGINAHANGLAN UG DUGO. ANG LAING HUGNA SA KAPAMILYA BLOOD DONATION CAMPAIGN HINUGPONG NGA KALIHOKAN SA KADAGKOAN SA CHONG HUA HOSPITAL UG SA DYAB 1512 ABANTE PA BISAYA.

Laslas sa presyo sa krudo, gasolina ug gas karong adlawa wa gikahimoot sa mga motorista.

ANG MGA MOTORISTA DINHI SA SUGBO WA MAHIMOOT NIINING GIPAHIBAWO NGA PAGKUNHOD SA PRESYO SA KRUDO UG SA GASOLINA, SANGLIT ANG TOTAL ADUNA LAMAY DUHA KA MGA GASOLINAHAN DINHI SAMTANG ANG SEA OIL NAGBINUGTONG LANG ANG ILANG GASOLINAHAN NGA ANAA NAHIMUTANG SA DAN HERNAN CORTES SA DAKBAYAN SA MANDAUE. GIPATUMAN SUGOD ALAS 12:01 SA TUNGANG GABII ROLLBACK SA PRESYO PRODUKTONG PETROLYO. ANG TOTAL PHILIPPINES MO-ROLLBACK UG 2 PESOS MATAG LITRO ILANG DIESEL UG KEROSENE, 1.50 SA ILANG PREMIUM UG UNLEADED NGA GASOLINA. SAMTANG PISO USAB SA ILANG REGULAR GHASOLINE. SAMTANG ANG SEA OIL NIPATUMAN NA USAB SA SUSAMA NGA KANTIDAD NGA LASLAS SA PRESYO SA KRUDO, GAS UG GASOLINA. APAN MATOD SA TOTAL, MOPASAKA SILAG PISO MATAG KILO SA ILANG LPG. GIPAABOT NGA MUSUNOD ANG UBAN PANG MGA OIL PLAYER SA PAGLASLAS SA PRESYO SA MGA PRODUKTONG PETROLYO.

Kapamilya lokal ug overseas job fair ug halad sa kapamilya sa liloan gihugpaan sa gatosan ka mga kapamilya.

NAGPADAYON  NA KARON ANG MGA SAKOP SA PESO DEPT. SA LUNGSOD SA LILOAN ARON SA PAG ATIMAN SA GATOSAN KA MGA KAPAMILYA NGA APLIKANTE UG TRABAHO ALANG SA IPAHIGAYON NGA KAPAMILYA LOKAL UG OVERSEAS JOB FAIR KARONG TIBUOK ADLAW KARON. GIHUGUPAN NA USAB SA GATOSAN KA MGA APLIKANTE UG TRABAHO NGA GIKAN PA SA COMPOSTELA,DAKBAYAN SA DANAO UG SA MGA LUNGSOD SA AMIHANG BAHIN SA PROBINSYA ANG PANFIL FRASCO SPORTS COMPLEX SUBAY SA MAONG KALIHOKAN. ANG STATION MANAGER SA DYAB 1512 ABANTE PA BISAYA LEO LASTIMOSA KUYOG NI MAYOR DUKE FRASCO UG SA MGA OPISYAL SA LUNGSOD SA LILOAN. 30 KA MGA LOKAL NGA MGA EMPLOYER SAMTANG 6 KA MGA LANGYAWNG KOMPANIYA ANG NISALMOT SA JOB FAIR. MGA SKILLED WORKERS, NURSES, UG MGA FACTORY WORKERS PARA SA TAIWAN ANG NAG UNANG GIKINAHANGLAN ALANG SA OVERSEAS JOB FAIR. SAMTANG, MGA TRABAHANTE SA MGA DEPT. STORE, OFFICE STAFF UG MGA TRABAHANTE SA PABRIKA ANG NAG UNANG GIKINAHANGLAN SA MGA EMPLOYER DINHI SA ATO. SAMTANG, PADAYON USAB NGA GIBAHAAN SA MGA KAPAMILYA ANG GIPAHIGAYON NGA HALAD SA KAPAMILYA SA LUNGSOD SA LILOAN. ANG MGA AHENSYA SA GOBERNO NGA NIDUYOG SA MAONG KALIHOKAN ANG GIHUGUPAN SA MGA KAPAMILYA ARON MAPAHIMUSLAN ANG ILANG SERBISYO BISAN UG ADLAW KARON NGA SABADO. ANG MAONG KALIHOKAN HINUGPONG PROYEKTO SA LOKAL NGA MGA OPISYAL SA LUNGSOD SA LILOAN UG SA DYAB 1512 ABANTE PA BISAYA.

Caretaker sa lungsod sa Compostela, gihulipan na

Mibalik na pagligkod isip caretaker sa lungsod sa Compostela si DILG
Director Pedro Noval, hulip kang Provincial Director Jerome Gonzalez.

Si Noval pormal nga nakadawat sa kamanduan gikan kang DILG Sec. Jessie
Robredo human muolbo ang tensyon sa mga dumadapig ni mayoral candidate
Joel Quino.

Basi sa kamanduan si Noval molingkod hangtud nga masulbad sa Comelec
ang petesyon nga gisang-at sa naparot nga kandidato Richie Wagas.

Si Noval nakigtagbo gilayon sa mga kawani sa lungsod pagsiguro nga
matarung ang serbesyo sa katawhan.

Ang kapakyas sa paghatag og tukmang serbesyo maoy usa sa hinungdan sa
pag sakmit sa kampo ni Quino sa balay lungsod niadtong myerkules sa
hapon. (June Berongan).

Kaso sa Dengue sa Central Visayas misaka na sa 1268

Misaka na ngadto sa 1268 ang kaso sa dengue sa Central Visayas karong tuiga.

Basi sa talaan sa Regional Epidemilogy and Surveillance Unit kon RESU
sa DOH7 miabut na sab og 10 ka mga tawo ang namatay sa maong sakit.

Ang dakbayan sa Sugbo padayong nag una uban sa 178 ka mga kaso uban sa
7 ang patay.

Gisundan sa dakabayan sa Mandaue nga mitala og 118 ka mga kaso, 114 sa
dakbayan sa Lapulapu, 57 sa dakbayan sa Talisay, 57 sa Dumaguete City.

Hinoon matud sa DOH 7 ubos pa og 76.41% ang kaso karong tuiga itandi
sa nakalabay'ng tuig nga mitala og 2, 237. (June Berongan).

Kapolisan Sa Olango Way Motorsiklo

Ang Kapolisan sa Isla sa Olango dakbayan sa lapu lapu nanginahanglan og motorsiklo aron ilang magamit sa ilang anti-criminality campaign. Ang hepe sa Police Station 1 sa isla sa olango PINSP Damiano Montebon personal nga mihangyo ni Lapu Lapu City Mayor Paz Radaza atol sa pagbisita ini niadtong miyerkules nga mahatagan sila og motorsiklo aron magamit sa intelligence og covert operations

Matod pa ni Inspector Montebon nga sa pagkakaron dunay lay usa ka patrol car ang Olango PNP og gikinahanglan nila ang mga unmarked vehicles alang sa ilang mga operation. Sa iyang bahin daling misanong si Mayor Radaza sa hangyo ni Montebon og gisultihan kin sa paghimo og request ngadto sa buhatan sa mayor aron maproreso na ang pagpalit sa motorsiklo

Sa nakalabayng buwan 8 ka mga motorsiklo ang gihatag sa Lapu Lapu City Hall ngadto sa PNP apan matod pa ni Montebon nga wala ma-apori ang ilang police station.
(Ferdinand D. Mañus)

Bayloan sa Globe og Libreng Texts ug Tawag ang May 9 service interruption

Makadawat og libreng text ug call minutes ang mga subscribers sa Globe agig hulip sa mga oras nga wa' sila makagamit sa serbisyo sa Globe niadtong lunes, Mayo nueve.

Mipadala karong adlawa og text message ang Globe ngadto sa mga subscribers niini pagpahibalo sa libreng text and call minutes. Ihatag kini ngadto sa mga subscribers sa dili pa ang Mayo 17. Wala hinoon ibutyag sa Globe pila ang libreng text ug call minutes nga ilang ihatag ngadto sa mga subscribers. 

Matud sa Globe, ila kining pasalamat ngadto sa mga subscribers sa pagpabilin diha sa ilang network ug sa samang higayon ila kini nga ilis sa nawala nga kahigayonan sa mga subscribers sa paggamit sa mga serbisyo sa network atol sa service interruption.

Nagub-an og sub-marine fiber optics cable ang Globe atol sa bagyong Bebeng hinungdan nga naapektuhan ang serbisyo niini sa Kabisay-an ug Mindanao sulod sa kapin wala ka oras. (juntariman)

Mayor Soc mipasalig dili pa mabalhin ang mga vendors

Dili pa mabalhin ang mga vendors sa bag-ong merkado karong mayo 28 pasalig ni
Mayor Socrates Fernandez.

Ang mayor naglisod paggunit sa bulak nga gihatag sa mga vendors kaniya dihang
miatobang siya sa grupo.

Gilista sa Mayor ang mga yangongo sa mga vendors atol sa interview sa DAYB ug
mipasalig nga iyang atimanon ang ilang mga kabalaka.

Si Mayor Soc mipatawag dayon sa mga sakop sa komitiba nga gitahasan sa plano
pagbalhin sa mga vendors sa bag-ong merkado.

Miangkon hinoon ang Mayor nakasabot siya nga supak gyud ang mga vendors sa
lakang.

Ang Mayor wala mopasalig sa mga vendors nga dili sila mabalhin apan naglaom ang
mga vendors nga katabangan sila sa mayor.  (Marlon Bellita)

Mga vendors sa Tabunok nagrally

300 ka mga vendors sa Tabunok Public Market sa Dakbayan sa Talisay nagmarcha
paingon sa City Hall ganihang buntag.

Tumong sa rally ang pagsupak sa lakang sa kagamhanan nga ibalhin sila sa bag-ong
merkado sa Barangay Lagtang.

Mayo 28 ang gikatakda nga pagbalhin, matud sa mga vendors bisan kahapsay pa ang
tumong sa Siyudad supakon nila ang lakang.

Alang nila kagutom ang ilang makuha sa higayon nga ipugos sa Siyudad ang
pagbalhin nila sa bag-ong merkado.  (Marlon Bellita)

Apartment sa usa ka daga gisaka sa manlungkabay sa Dakbayan sa Carcar.

Nagbakho nga nireklamo sa mga pulis sa Dakbayan sa Carcar ang usa ka 28 anyos nga daga human nga giatake sa manlungkabay ang apartment nga iyang giestaran.   Ang biktima naila sa ngan nga si Lovely Canasa 28 anyos nga kasamtangang nanimuyo sa Brgy. Bolinawan Dakabayan sa Carcar.   Gitumbok sa biktima nga si Canasa ang iyang silingan nga notado nang hilabtanon ug kabtangan nga mao si Gilbert Alonzo 21 anyos.   Basi sa reklamo sa biktima ngadto sa mga pulis, nga pugsanong gisud sa suspetsado ang liko nga bahin sa iyang apartment.   Sa diha nga nakasud na ang suspetsado gipangpas-an niini ang iyang mga appliances ug giapil pa gyud pagpamupho ang iyang mga sinsiyo nga tinigum.   Niturok ang katahap sa biktima batok ni Alonzo sanglit dungan sa pagkahanaw sa iyang mga kabtangan kalit usab nga nahanaw sa ilang dapit ang gikatahapan.   ( Najib M. Cubio )

Carthographic sketch sa nitulis sa tindahan ug alahas sa Junquera ipagawas sa T.R.S.

Gipaabot nga ipagawas sa mga sakop sa Theft and Robbery Section sa kapulisan sa Dakbayan sa Sugbo ang hulagway sa mga tulisan nga niigo sa J & A wholesale Trading Fashion Accessories sa Dakbayan sa Sugbo.   Ang pangu sa T.R.S. P/C.Insp. Bonifacio Garciano nagkanayon nga nakig alayon sila karon sa mga saksi sa maong krimen aron nga makuha ang hulagway sa 3 ka mga tulisan.   Suma pa ni Maj. Garciano nga dako ug matabang ang pagpagawas sa artist sketch sa mga suspetsado sanglit daghan na unyang mga tawo ang makahatag nila ug inpormasyon labot sa mga gikatahapan.   Hinoon, nagduda si Maj. Garciano nga taga dinhi ra sa dakbayan ang mga responsable gumikan sa ilang pagtaptap sa ilang dagway.   Sigon pa niya nga posibling nahadlok ang mga suspetsado nga mailhan sa mga tindera ang dagway sa mga tulisan hinungdan nga sila nagtaptap sa ilang nawng.   ( Najib M. Cubio )

Alas 3 karong hapon maluto na ang labing dako nga bingka sa tibuok kalibutan.

Gipasalig sa tigpasiugda sa suway nga pagkulit ug record sa labing dako nga bingka sa tibuok kalibutan sa Dakbayan sa Mandaue nga maluto karong alas 3 sa hapon ang maong bingka.   Si Clark Pelaez sa Taga Mandaue Inc. kinsa maoy nipasiugda sa kalihokan niingon nga ila gyud nga kab-oton ang oras nga ilang gitarget sa pagluto sa labing dako nga bingka.   Samtang ang mga magtutudlo sa tanang publikong tunghaan sa Dakbayan sa Mandaue kuyog sa ilang mga nitun-an nga nibulontaryo sa pagluto sa labing dako nga bingka nitataw nga ila gyung mahuman ang ilang tahas.   Karong buntag nibanos ang laing grupo sa mga tinun-an aron pulihan ang ilang mga kauban nga maoy nagtukaw sukad pa kagabie sa pagluto sa bingka.   Suma pa ni Pelaez nga dul-an sa 300 ka mga magtutudlo ug tinun-an sa Dakbayan sa Mandaue ang nagtinabangay sa paghikay sa labing dako nga bingka sa kalibutan nga giluto sa Mandaue.   ( Najib M. Cubio )

Confirm your email address

Thank you for using Posterous! Click here to confirm your email address:   Click to confirm your email address       Sent by Posterous. Get this in error? Ignore it, with our apologies. Have other questions? We'd love to help.

Mayor Radaza mo inspection sa mga Police Station karon buntag.

Mo inspection karon buntag si Lapu Lapu City Mayor Paz Radaza sa mga police stations sa lapu lapu. Si SP01 Rodito Viocente sa Police Community Relations sa Lapu Lapu City Police Office miingon nga unahon sa pag susi sa mayor karon buntag mao ang Mactan Police Station dayon isunod ang Pusok Police Station

Matod pa ni Viocente nga si Radaza kuyog ang representanti sa DILG nga mosusi sa mga personnel sa mga police stations. Apil pud nga susihon ang capability sa mga polis sa pagtubag sa bisan unsang matang sa alarma.
(Ferdinand D. Mañus)

Duha ka Multicab Nagsungag sa Lapu

Wana maporma ang atubangan sa duha ka multicab human nga nagsungag sayo karong buntag sa may ML Quezon Hi-way sakop sa Brgy Ibo dakbayan sa lapu lapu. Usa ka passenger type nga multicab nga nagdala sa plaka nga GVX-173 nga gikan sa brgy ibo og padung sa Tamiya sa brgy basak ang gidasmagan sa usa ka owner type nga multicab nga dunay plaka nga YGY-953 nga gikan sa dakbayan sa Mandaue

Matod pa ni Zaldy Docalos,Imbestigador sa MEZ Police mibutyag nga pasado alas singko ang takna ganihang buntag nga mikawat og lane ang owner type multicab og nasungag ang passenger multicab sa pikas lane. Na-angol ang mga pasahero sa multicab nga dipasaheroan nga sila si Jenny Momo 33 anyos, Jerte Pistola 22 anyos, Marilyn Manubag 20 anyos, Rolando Alberto 21 anyos og Randy Galindo ang mga na-angol didto gidala sa Mactan Doctors Hospital.

Pangos ra hinuon sa iyang bitiis ang na-angkon sa passenger type multicab nga si Randy Balindo nga taga barangay Mactan. Samtang ang driver sa owner type multicab nga si Samuel Borres giingong kritikal ang kahimtang og didto gidala sa usa sa mga tambalanan sa dakbayan sa sugbo. Laing na-angol nga sakay sa multicab nga gimaneho ni Borres mao sila si Viviano Abregana og si Liza Inarsosa.
(Ferdinand D. Mañus)

Balay nasunog

Nasunog ang usa ka panimay samtang nangaon sa pamahaw ang mga sakop sa pamilya.

Dako na ang kayo dihang nakabantay ang pamilyang Saniel nga nasunog ang iduhang
andana sa ilang panimay.

Dali hinoon narespondihan sa kabomberohan sa Siyudad sa Talisay ang alarma nga
nagbase sa Talisay City Hall duol ra sab sa nasunogan.

Ang alarma nadawat sa sub-station sa Poblacion Talisay alas 7:11 sa buntag sa
Sitio Kalmar Lawaan 1 sa Siyudad.

Matud ni SFO3 Felipe Abarquez nakauna na ang firetruck sa main station dihang
miabot sila sa dapit.

Walay naangol apan totaly damage gyud ang panimay sa pamilyang Saniel.

Matud ni Abarquez kandila maoy gitumbok nga hinungdan sa pamilya nga ilang
nabiyaan nga nagsiga paghuman sa ilang pag-ampo.

Wala pa masusi ang danyos samtang susihon pa sab kon wala bay laing hinungdan
ang sunog. (Marlon Bellita)

Batan-on nalumos

Epekto sa bagyong bebeng ug sa hanging habagat maoy gitumbok nga hinungdan sa
pagkalumos sa usa ka 19 anyos nga si Jessie Gabasa.

Si Gabasa nga taga Sitio Neighborhood sa Barangay Tabunok Dakbayan sa Talisay
uban sa iyang mga kaliwat ug higala naligo sa Malayan Beach Resort.

Taob ug dagko ang bawod.

Si Gabasa gikatahong misuway paglangoy gikan sa dike paingon sa baybayon dihang
nalumos.

Gidali siya pagdala sa Talisay District Hospital apan gideklarar nga dead on
arrival. (Marlon Bellita)

Nagtan-aw sa Pacquiao-Mosley Fight, Namatay

Naglisod na og ginhawa ang 67 anyos nga is Sonny Estrimos pag-abot sa ika napu nga round sa away ni Manny Pacquiao ug Shane Mosley.

Nitan-aw si Estrimos sa live nga away sa panimay sa iyang silingan sa Bgry Quiot sa Dakbayan sa Sugbu.

Apan wa na kahuman og tan-aw sa away si Estrimos human siya gidali sa pagdala sa Cebu City Medical Center.

Gisuway pa sa pagtabang si Estrimos apan nakabsan gihapon sa kinabuhi. (RC Dalaguit)

Pacquaio Midaog Batok Mosley

Nadepensahan ni Manny Pacquiao ang iyang WBO Welterweight Title batok kang Shane Mosley.

Nidaog si Pacquiao pinaagi sa unanimous decision sa 12 ka rounds nila nga away ni Mosley.

Sa ikatulong round, gi-knockdown ni Pacquiao si Mosley, apan natumba si Pacquiao sa dihang gitukmod ni Mosley sa 10th round.

Nakontrolar hinuon ni Pacquiao ang tanang rounds sa away samtang si Mosley ang napunay og likay sa mga combination ni Pacquiao. (RC Dalaguit)

Boston Celtics nipabugnaw sa Miami Heat sa game 3 sa Eastern Conference semi finals.

Gipabugnaw sa Boston Celtics ang Miami Heat atol sa game 3 sa best of seven semi final round sa Eastern Conference semi finals sa NBA.

Bisan pa man sa pagkaangol sa kilas nga guardiya sa Celtics nga si Rajon Rondo sa 4th quarter sa maong duwa apan nakalahotay gihapon ang Celtics sa pagposte ug kadaugan batok sa Miami Heat pinaage sa iskor nga 97 kontra 81.

Si Kevin Garnett nipaaslay sa iyang 28 pontos ug nilangkat ug 18 ka rebounds.

Samtang si Paul Pierce niamot ug 27 puntos.

Pinaage sa kadaugan sa Celtics nakalikay sila sa mas lisud nga kahimtang sa series nga 3-0.

Ang series sa Eastern Conference semi finals 2 -1 na.
Nakabintaha pa gihapon ang Miami Heat nila ni Dwayne Wade, Cris Bosh ug Lebron James.

( Najib M. Cubio )

Memphies Grizzlies nidugmok sa Oklahoma City Thunders sa NBA West Conference semi finals.

Wa makaugpo si Kevin Durant ug ang kinatibuk ang pwersa sa Oklahoma City Thunders gikan sa nagmangtas nga si Zach Randolph ug ang tanang Grizzlies.

Apan nagkinahanglan pa gyud ug dugang 5 minutos ang Grizzlies aron hingpit madispatsar ang Thunders pinaage sa iskor nga 101 kontra 93.

Sa pagkapopos sa 4th quarter nagtabla ang iskor nga 86 hinungdan nga niabot sa overtime period ang duwa.

Sa pagsugod sa overtime period wa na mamilok pa ang Grizzlies ug nagmangtas pag ayo si Zach Randolph sa iyang pagpabuhagay ug mga puntos.

( Najib M. Cubio )

Coast Guard nitugot na sa mga barko nga makalawig human gilibkas ang storm warning signal.

Gitugotan na sa kadagkuan Coast Guard dinhi sa Sugbo nga makalawig ang mga barko nga gigaid sukad kagabie gumikan sa epekto sa bagyong Bebeng sa pipila ka bahin sa Eastern Visayas.

Ang pangu sa Coast Guard dinhi sa Sugbo Commander Rolando Punzalan nagakanayon nga wa na silay rason sa pagpadayon nga paggaid sa mga sakyanan sa dagat.

Gidugang pa ni Commander Punzalan nga sagad sa mga barko nga wa mulawig kagabie nibolontaryo sa pagkanselar sa ilang mga biyahe.

Bisan pa man ug nilurang na ang epekto sa bagyong Bebeng dinhi sa Tunga-tungang Kabisay-an apan padayon gihapon sila nga nagmonitor sa kadagatan sanglit daghan nag mga mananagat ang di makasugakod sa padayong pagdagko sa mga bawd ilabi na sa lawd.

( Najib M. Cubio )

Sakyanan ni Manny Pacquiao nadisgrasya gikan siya niatambong ug santos nga misa.

Nakasugat ug disgrasya ang sakyanan nga giluwanan sa pinoy boxing super star Manny Pacquiao didto sa Las Vegas Nevada karong buntag oras dinhi sa Pilipinas.

Gikataho nga gikan nitambong si Manny Pacquiao ug ang Team Pacquiao sa usa ka santos nga misa pipila ka takna sa di pa ang ilang sangka ni Sugar Shane Mosley.

Samtang nagpadung si Pacquiao sa hotel nga iyang giistahan sa Las Vegas Nevada gikareport nga nagkabangga ang sakyanan ni Pacquiao ug ang sakyanan sa iyang mga security personnel.

Ang coach ni Manny Pacquiao, Freddie Roach nitino nga way maunsa ang pinoy boxing hero.

Suma pa ni Roach nga himsug ang iyang batos ug wa kini matandog bisan gamay sa maong aksidente.

Gipasalig ni Roach nga 100% ang kahimsug ni Pacquiao nga mukatkat sa ring pipila ka takna gikan karon.

( Najib M. Cubio )

CPPO niawhag sa publiko nga di magsugal sa sangka ni Pacquiao ug Mosley.

Giawhag karon sa kapulisan sa Probinsya sa Sugbo ang publiko nga di magsugal atol sa sangka nila ni Manny Pacquiao ug Sugar Shane Mosley karong adlawa.

Ang Hepe sa kapulisan sa Probinsya sa Sugbo P/Sr. Supt. Patrocinio Comendador nagkanayon nga iyang ipadakop ang mga tawo nga masakpan sa akto nga nagsugal.

Matod ni Col. Comendador nga iya nang gimandoan ang kapulisan sa kalungsuran nga di magtanga sa pagtan aw sa mga telebisyon aron nga di sila malutsan sa dautang elemento sa katilingban.

Nabalaka si Col. Comendador nga posibling musangko sa away ang pinustahanay sa away ni Pacquiao.

( Najib M. Cubio )

Kapulisan sa Dakbayan sa Mandaue doble alerto nunut sa away ni Manny Pacquiao ug ang kasaulogan sa pista sa Mandaue.

Doble alerto karon ang kapulisan sa Dakbayan sa Mandaue sanglit duha ka mga dagkong kalihokan ang ilang bantayan karong adlawa.

Ang Hepe sa kapulisan sa Dakabayan sa Mandaue P/Sr. Supt. Noel Gillamac nipakanaog nag kamandoan nga way pulis nga muday off o muleave karong adlawa.

Padayon nga gimonitor karon sa mga pulis ang mga dapit nga hugpaan sa mga tawo karong buntag alang sa pagsaksi sa sangka nila ni Manny Pacquiao ug Sugar Shane Mosley.

Lain nga gitotokan karon sa kapulisan sa Mandaue mao ang mga kalihokan sa kapistahan sa Dakbayan sa Mandaue ug diin gipaabot nga hugupan sa mga dumuduong ang kinapusuran nga bahin sa dakbayan.

Dili buot si Col. Gillamac nga malutsan sa mga kiriwan ug kamot ang mga kalihokan karong adlawa.

( Najib M. Cubio )