Uminto Na Sang Lana sa Sugbo

Wa gyod papiri ang higanteng mga kompaniya sa lana.

Bisan sa awhag nga hunongan una pagpasaka ang presyo sa lana atol sa Semana Santa, ang Pilipinas Shell nipausbaw sa presyo sa ilang gasolina ug kerosene bale og P0.60 matag litro ug sa krudo bale og P0.25 matag litro.

Sa pagsuwat ini, wa pa hinuon makapausbaw sa ilang presyo ang Petron, ang labing dakong kompaniya sa lana sa Pilipinas, ug Chevron, kanhi Caltex.  (Leo Lastimosa)

Katapusang Pagsusi

Mag-abut karung alas 9  sa buntag ang mga sakop sa CITOM, DPWH, WTG ug si Cebu City Mayor Michael Rama
sa Mambaling Fly-Over harun sa pagsusi kung unsa na kaandam and maong Fly-Over sa
pagbukas niini sa mga motorista ugmang adlawa. Una nang nipahibaw ang DPWH nga
mag-paabut pa ang syudad ug lima ka buwan una kini ablihan kay kini matud pa sa DPWH dili pa luwas apan kini gisupak ni Rama.

Wade Way Seguro Para sa Heat

Way klaro makaduwa ba si Dwyane Wade sa ikaduhang sangka sa Miami Heat
ug Philadelphia 76ers sa unang hugna sa NBA Eastern Conference
playoffs.

Kini tungod sa grabeng migraine nga nakapugong ni Wade pag-apil sa
praktis sa Heat.

Malaumon si Lebron James nga makatunga si Wade sa duwa.

Gilabdan nang daan sa ulo si Wade atol sa pagdaog sa Heat sa 76ers sa
unang duwa niadtong Dominggo sa kadlawon (sa oras sa Pilipinas).

Ang Heat ang usa sa kinaham nga ma-kampeyon sa NBA karong tuiga tungod
sa panaghugpong nilang James, Wade ug Chris Bosh. (Leo Lastimosa)

Aslom nga Ubas

Mao ni paghulagway sa inilang mga magpapatigayon sa Sugbo sa panaway
ni kanhi presidente Gloria Arroyo batok ni Presidente Noynoy Aquino.

Matod nila mas maayo si PNoy nga pangu kay ni Arroyo.

Nipuno sila nga lahi sa pamunoang Arroyo wa nay dagkong kinawatay nga
nahitabo sa bag-ong pamunoan.

Gitambagan sa Sugbuanong mga negosyante nga nihangyo nga di lang ilhon
nga mas maayo pang mangandam na si Arroyo pag-atubang sa mga kasong
pagpangawkaw, nga segurong mapasaka batok niya kon mapalagpot na sa
katungdanan si Ombudsman Merceditas Gutierrez. (Leo Lastimosa)

Robinson's Management Gisaway

Hangtod karon, tak-om ang management sa Robinson's Place mahitungod sa
sunog nga niulbo sa ilang shopping mall sa Fuente Osmena, Cebu City
niadtong Dominggo sa hapon.

20 ka biktima ang nangapaso, nangapangos ug nakasingo og aso atol sa sunog.

Mga mamaligyaay sa mall nangreklamo nga hasta sila wa atubanga sa management.

Wa pa silang kahibawo kanus-a makabalik pagpamaligya ug kanus-a
mahibalik ang operasyon sa mall. (Leo Lastimosa)

MCIAA Mas Limpiyo Na

Wa na mangalisbo ang mga pansayan sa Mactan Cebu International Airport.

Mao ni paniid sa pipila ka lokal ug langyaw nga mga pasahero.

Matod nila mas hugaw ang MCIA ubos sa nangaging mga pamunoan kay way
tarung limpiyo sa tugpahanan, labi nang mga pansayan.

Karong bag-o nauwawan ang Pilipinas dihang giila sa kalibotanong
kahugpongan ang NAIA nga maoy labing hugaw ug kurakot sa tibuok Asya.
(Leo Lastimosa)

Halad sa La Libertad

Laing Halad sa Kapamilya ang ipahigayon.

Ang dakong piyesta sa libreng mga pangalagad himuon karong Abril 24,
Dominggo sa pagkabanhaw, sa Municipal Auditorium sa La Libertad,
Negros Oriental.

Ang Halad sa Kapamilya sa La Libertad maglakip sa local ug overseas
job fair ug one-stop shop sa nag-unang mga serbisyo sa gobyerno.

Hinugpong ni nga proyekto sa Munisipyo sa La Libertad ug sa DYAB
Abante Pa, Bisaya! (Leo Lastimosa)

May 1 Job Fair sa Sugbo

Apil ang Sugbo sa nasudnong job fair karong Mayo 1.

Ang tibuok adlaw nga kalihokan pasiugdahan sa Department of Labor and
Employment (Dole) aron pagtimaan sa adlaw sa pamuo.

Kaliboan ka trabaho ang maaplayan sa local ug overseas job fair nga
ipahigayon sa Abellana National School gym sa Dakbayan sa Sugbo.

Duna say ipahigayon nga one-stop shop sa nag-unang mga pangalagad sa
gobyerno nga gitanyag sa DFA, NSO, NBI, SSS, GSIS, LTO ug uban pang
mga buhatan. (Leo Lastimosa)

Budget Para Recall

Dunay budget ang Comelec kon mahinayon ang recall election sa Danao
City karong tuiga.

Gitataw ni Comelec 7 Regional Attorney Enerio Ocariza nga may gigahin
nang daan nga pundo alang sa kahigayonan sa recall elections.

Nihulga si Danao City Vice Mayor Ramonito Durano III paglusad og
recall proceedings batok sa iyang maguwang nga si Danao City Mayor
Ramon Durano Jr.

Gikiha sa mga konsehal sa Danao si Mayor Durano tungod sa giingong
pangabuso sa gahom. (Leo Lastimosa)

Libingan Ilisan ang Ngan?

Giawhag si Presidente Noynoy Aquino sa pag-usab sa ngan sa Libingan ng mga Bayani aron paglikay sa pagtumaw sa dugang mga kontrobersiya.

Si Atty. Pepe Diokno niingon nga ang orihinal nga minteryo mao ang Republic Memorial Cemetery apan giusab ni anhing Presidente Ramon Magsaysay ngadto sa Libingan ng mga Bayani.

Matod ni Diokno gawas sa patayng lawas ni Ferdinand Marcos, makontrobersiyal na sab ang minteryo kon adto sab ipalubong didto ang mga patayng lawas sa ubang kontrobersiyal nga mga presidente.

Nipasabot si Diokno executive order rang PNoy ang gikinahanglan pag-usab sa ngan sa minteryo.  (Leo Lastimosa) 

225 ang na Hired On the Spot sa local job fair sa barangay Bulacao

Miabut sa 225 ang na "Hired on the Spot o nadawat gilayon sa labing unang local job fair nga gipahigayon sa barangay Bulacao sa habagatang dakbyan sa sugbo niadtong sabado.

Si Fidel Magno ang pangulo sa Department of Manpower Development and Placement kon DMDP mihangop kaayo sa lahi nga pagpangandam sa mga opisyal sa barangay.

Samtang mapasalamaton ang mga opisyal sa barangay nga sa labing unang higayon gipahigayon ang job fair sa ilang kaugalingong tugkaran.

Misad si Magno nga dugang job fair ang ipahigayon sa maong barangay

Miabut og 20 ka mga employers ang nag abut alang sa dinaliang panginahanglan sa mga nagkadaiyang posisyon.

Ang maong programa hiniusang proyekto sa DMDP sa syudad sa sugbo ug DYAB1512 Abante Pa Bisaya.

Ang laing hugna sa lokal job fair ipahigayon karong Abril 30 sa barangay Banilad sa syudad sa sugbo ug ang Overseas Job Fair karong Mayo 1 atol sa adlaw sa pamuo. (June Berongan)

Misuway og baligya Cocanine sa mga Polis pasakaan na og kaso karong adlawa

Ipresentar na karong adlawa ang gidudahang level 2 nga mga drug pushers nga nadakpan sa kapolisan niadtong sabado sa buntag nga misuway og baligya sa gituohang Cocaine nga mobalor og 20 milyones pesos.

Sila si Eric Balansil, 34, and Darwin Debuque, 36 pulos taga Leyte ang pasakaan na og kaso karong adawa human madakpi atol sa buybust operation sa Regional Anti-Illegal Drug Operations Task force sa PRO7 didto sa usa ka fast food chain sa barangay Pajo sa dakbayan sa Lapulapu.

Nasakmit sa duha ang tulo ka "bricks" nga gitouhang Cocaine nga may timbang nga tulo ka kilo.

Ang kapolisan migamit og marked money nga 1.4 ka milyon ka pesos.

Si Senior Supt. Ismael Fajardo miingon nga ila nang gipanid-an ang kalihokan sa mga dinakpan sud na sa duha ka buwan.

Dugang ni Fajardo nga ang duha naglihok sa Eastern, Western and Central Visayas sa pagpamaligya og Cocaine.(June Berongan)

Buhatan sa Department of Energy 7 sulngon sa mga Transport Groups karong buntag

Mag rally karong buntag ang mga drivers ug mga operators nga sakop sa Nagkahiusang Driver sa Sugbo kon NADSU  sa buhatan sa Department of Energy.

Ang Pangulo sa NADSU Roy Opura nga napakyas ang maong ahensya sa pagpanalipod sa mga drivers ug mga sumasakay.

Subling awhagon sa NADSU ang gobyerno nga tangtangon na ang 12% nga VAT sa lana aron mapugngan ang pagsaka sa presyo sa lana.

Dugang ni Opura nga dili sulbad ang pagpanghatag og fuel subsidy sa mga PUJs tungod kay wa pay kasiguroan hangtud kanus-a pagsaka sa presyo niini.

Gisalikway hinoon niya ang kahugayonan nga may mga rota nga maapektohan kon daghan ang mga drivers nga magpanon sa DOE. (June Berongan)

Road Worthiness Test ipahigayon sa LTO 7 sa terminal sugod karong adlawa

Pagsiguro nga luwas ang byahi sa mga pasahero nga mopauli sa nagkadaiyang bahin sa probinsya sa lunes santo, sugdan na ang kinalit nga pagsusi sa mga Buses himoon sa Land Transportation Office kon LTO 7 sa mga terminals.

Si LTO 7 Regional Director Raul Aguilos mipahibawo nga ang mga technical personnel sa Motor Vehicle Inspection System kon MVIS maoy mo susi sa mga "brakes" ug mahinungdanon bahin sa sakyanan.

Matud ni Aguilos nga ang may depekto nga mga sakyanan dili maka byahi ug dad-on sa MVIS.

Samtang gipahibawo ni Aguilos nga dakpon ang mga drivers sa mga Buses kon mobyahi sa dili ilang rota kon way special permit gikan sa LTFRB. (June Berongan).

ALU TUCP Mosang-at na karong adlawa sa 75 pesos nga umento sa suhulan

Human ibasura sa Regional Tripartite Wages and Productivity Board ang P124 nga umento sa suhulan, turno na sab sa Assoicated Labor Union-Trade Congress ofthe Philippines ko ALU TUCP ang pagsang-at sa 75 pesos nga umento sa suhulan.

Ang tigpamaba sa ALU-TUCP Joy Lim miingon nga ang padayong pagsaka sa presyo sa lana ug ang 4.5 porsento nga inflation rate igo na nga basihan nga may supervening events ang pagsang-at sa umento sa suholan sa mga trabahante dinhi sa sugbo ug kabisay-an.

Gihangop sab ni Lim ang pamahayag ni Presidente Aquino nga gikinahanglang tun-an na ang pagpa umento sa suhulan.

Ang ALU-TUCP sa National Capital Region kon NCR misang-at sab og 75 pesos nga umento sa suholan niadtong nakalabay'ng Marso.

Ang Wage Board mibasura sa petesyon sa  Alliance of Progressive Labor kon APL tunglod sa kakuwang sa basihanan niadtng Pebrero 25.(June Berongan)

16Omil Pesos Danyos sa Sunog sa Robinsons

Nilanat pa og kapin sa duha ka oras una nideklarar ang kabumberuhan sa Sugbu nga under control na ang sunog nga miulbo sa Robinsons Mall sa uptown area. Nadawat sa Cebu City Fire Department ang alarma sa sunog alas 3:04 sa hapon ug nadeklarar nga fire out sud sa usa ka oras ug traynta minutos. Apan matud sa imbestigador FO2 Emilliano Daño Jr. nga tungod sa kakuwang sa ventilation ug pagkabaga sa aso, naglisud sila nga mapenetrate ang sud gyud sa mall. Sa ilang nahipos nga kasayuran, adunay nabati nga buto sa kisame sa stockroom sa usa ka botique sa 2nd floor sa mall. Nisunod dayon ang pagflactuate sa power supply ug dayon ang pag-ulbo sa kayo gikan sa lugar diin nabati ang buto. Gisuway pa sa mga trabahante pagpawng ang kayo gamit ang fire extinguisher, apan dali nga midako ang kayo. Matud ni Daño nga nakagawas ra nuon dayon tanan ang mga customers ug empleyado sa mall. Dugang ni Daño nga naconfine lamang ang kayo sud sa mall. Apan mga guests ug mga
empleyado sa Cebu Midtown Hotel ang girescue tungod dugay nga naabisuhan kalabot sa sunog. Usa sa mga guest sa hotel ug laing tenant sa mall miingon nga wa sila makadungog og fire alarm. Kining maong pasangil ipasusi pa ni Cebu City Mayor Michael Rama. Mikabat ang danyos sa sunog ngadto sa 160mil pesos diin ang botique diin nagsugod ang sunog mao lamang ang na-totally burned. lakip sa kadaut mao ang bildo sa mall ug sa hotel nga gipamuak aron maoy kasudlan sa mga firefighters. Samtang ang ubang mga baligya sa mall ang nangadaot lamang tungod sa tubig nga gipasirit. Gi-cordone pa ang mall sa pagkakaron, samtang ipadayon pa sa kabumberuhan ang imbestigasyon sa hinungdan sa sunog. Gisuta pa usab ni Daño kon dunay mga nasamdan apan sa iyang inisyal nga report, dunay nasamad atol sa rescue operation.

Sunog Sa Mall Nagpadayon (update)

Milanat og hapit usa na ka oras ang pagkumbati sa kabomberuhan sa sugbo sa kayo nga miulbo sa Robinson Mall sa uptown area. Nagpabilin sa 2nd alarm ang kayo apan naglisud ang mga firefighters tungod sa kakuwang sa breathing apparatus. Ning higayuna, duna nay mga firefighters uban sa mga sakop sa Emergency Rescue Unit Foundation ang nisungasong sud sa mall ug nisugat sa kayo aron pagpawong. Naglisod ang mga rescuers sa pagluwas sa mga natanggong sud sa mall ug usab sa mga guest sa Midtown Hotel. Dali nga mikatap ang kayo gikan sa Mall padung sa hotel. Sa kasamtanagn, duna nay duha ka mga tawo ang nasamdan. (RC Dalaguit)

Mall sa Sugbu Nasunog

Naigo sa sunog pasado alas 3 karong hapon ang Robinsons Mall sa uptown area sa dakbayan sa Sugbo. Inisyal nga report nga nakuha sa DYAB nagkayaon nga nagsugod ang kayo sa kisame sa ground floor sa mall diin nadungog ang usa ka buto. Naglisod ang mga rescuers tungod sa pagkatrap sa pipila ka mga tawo sud sa elevator. Nigamit ang mga rescuers og pisi aron sa pagpakanaog sa mga natrap sa elevator ug sa 3rd floor, apan pipila ka gutlo, gihunong sa mga rescuers ang pagpakanaog nila human nga gideklarar nga nacontrol sa kabumberuhan ang kayo. (RC Dalaguit)