Mga tunghaan gisusi sa kapulisan usa ka adlaw sa di pa mubukas pagbalik ang klase.

Gisugdan na sa pagsusi sa kapulisan didto sa kaulohan ang mga lawak saringanan usa ka adlaw sa di pa mubukas pagbalik ang klase. Ang kapulisan nabalaka sa seguridad sa mga tinun an sa ilang pagbalik ug sud sa ilang mga klase ugmang adlawa subay sa namatikdan nga nangatumpag nga mga kural sa uban nga mga skwelahan. Buot nga makaseguro ang kapulisan nga di madali dali sa pagsud sa mga kiriwan ug kamot ang mga compound sa mga tunghaan aron usab di mamiligro ang mga studyante sa ilang pagtuon. Ugmang adlawa sayo ipabaha sa kapulisan sa kadalanan tungod sa mga tunghaan aron di makahuego ang mga mangingilad ug mga karawatan nga mamiktima sa mga studyante.   ( Najib M. Cubio )

Mga pulis ipabaha sa kadalanan ugmang adlawa sa pagbukas ug balk sa klase.

Ipabaha sa kapulisan sa dakbayan sa sugbo ang gatosan ka mga pulis ugmang adlawa sa pagbukas sa klase. Ang mga sakop sa T.R.S. sa Cebu City Police Office pinangulohan ni P/C. Insp. Bonifacio Garciano karon pa lamang adlawa naglibod suroy na sa kadalanan aron sa pagpangita sa mga notado nga criminal aron din a kini sila makapamiktima sa mga tinun an sa pagbukas sa klase ugmang adlawa. Matod ni Maj. Garciano nga ila na usab nga gipalihok ang mga intelligence operatives aron sa pagmonitor kon aduna bay nangabot nga mga dayo nga mga kiriwan ug kamot dinhi sa sugbo. Subli nga gipahimangnoan ni Maj. Garciano ang mga ginikanan ug mga studyante nga di magdala ug daghan nga mga kabtangan sa ilang pagtungha ugmang adlawa sa pagbukas sa klase.   ( Najib M. Cubio )

Mga traffic enforcers wa tugoti nga maka day off o makaleave ugmang adlawa.

Way gitugutan nga sakop sa CITOM nga makaday off o makaleave ugmang adlawa sa pagbukas ug balik sa klase. Si Richie Famador sa City Traffic Operations Management kon CITOM nitug an sa DYAB Radyo Patrol nga ipakatap ugmang adlawa ang tibuok pwersa nila sa kadalanan. Matod ni Famador nga ang mga tugkaran sa mga skwelahan maoy ilang gitotokan aron makagiya sa mga motorista. Gipanglantawan sa CITOM ang paghuot sa kadalanan ilabi na sayong takna sa kabuntagon.   ( Najib M. Cubio )

Negosyante nga gipatay sa Brgy. Talamban ilubong na karong buntag.

Ilubong na karong buntag ang magpapatigayon nga napatay sa Brgy. Talamban niadtong nakalabayng semana. Si Randy Librando kinsa gipatay sa wa pa mailhi nga mga tawo ang ihatud na sa iyang katapusang pahulayanan sa Manpark sa Dakbayan sa Mandaue. Ang iyang igsuong babaye nga si Judy Ann Librando nisugilon sa DYAB Radyo Patrol nga ipahigayon ang pagbindisyon sa patayng lawas sa iyang igsuon sa Our Lady of Fatima Parish sa Basak Mandaue City karong alas 9:30 sa buntag. Suma pa ni Judy Ann nga inig human sa pagbindisyon sa iyang igsuon idiritso na nila sa paghatud sa iyang katapusang lubnganan si Randy diha sa menteryo sa Mandaue. Matod ni Judy Ann nga di pa gyud nila madawat ang gidangatan sa ilang igsuon nga si Randy. Padayon nga nangayo ug hustisya ang banayng Librando nunut sa kamatayon ni Randy. ( Najib M. Cubio )

Ikaduhang adlaw sa lokal job fair sa Consolacion nakaarangkada na.

Nakapanukad na ang ikaduhang adlaw sa laing hugna sa kapamilya lokal job fair sa lungsod sa Consolacion. Karong adlawa mao ang ikaduahang adlaw sa pag abi-abi sa mga employer sa gatosan ka mga applikante ug trabaho nga padayong nihugop sa lokal job fair sa usa ka shopping mall nga buksan sa lungsud sa Consolacion. Ang kadagkoan sa maong mall nipasalig nga adunay mga trabaho nga nagpaabot alang sa mga lumolopyo sa kalungsuran sa amihanang sugbo ilabi na sa kinto distrito. Nasayran nga sukad pa kagahapong adlawa way puas ang pag abot sa mga applikante ug trabaho sa covered court sa Lungsod sa Consolacion aron sa pagpangindahay ug panginabuhian. Ang laing hugna sa Kapamilya lokal job fair hinugpong nga proyekto sa lokal nga mga opisyal sa Lungsod sa Consolacion ug sa DYAB 1512 Abante Pa Bisaya.   ( Najib M. Cubio )