Signature Campaign Paghingan sa Mambaling Flyover og Sergio Damaso, Gisugdan Na

Ang mga Josenians nagsugod na sa pagkuha og perma alang sa pag awhag sa kagamhanan sa dakbayan sa sugbo ug sa National Historical Institute nga hinganlan ang bag-o lang natapos nga Mambaling flyover ngadto sa Sergio Damaso ang bantogang Scoutmaster sa University of San Jose Recoletos kon USJR.

Ang kanhi Chairman sa Dangerous Drugs Board Atty.Clarence Paul Oaminal miingon nga angay'ng yukboan ang gitisok nga mithi sa scouting nga maoy gibilin ni Damaso sa dili lang sa USJR apan lakip sa Scouting Community dinhi sa sugbo.

Matud ni Oaminal nga daghang mga Josenians nga mga opisyal sa barangay sa South distict nga mosuporta sa iyang sugyot.

Gipasabut ni Oaminal nga daghang mga Flyover dinhi sa sugbo ang way mga pangalan apan may mga pangalan ang tanang kadalanan.

Konsultahon pa hinoon ni Oaminal ang Department of Interior and Local Government kon DILG kon mahimo bang malakip ang mga Flyover ubos sa lagda sa pangpangan sa mga "Bridges" ubos sa Local Government Code.

Kon may babag sa nasudnong lagda hangyoon nalang ni Oaminal ang konseho sa syudad sa sugbo sa pagpalabang og Ordinansa nga hinganlan og Sergio Damaso flyover ang labing unang Flyover sa habagatang dakbayan sa sugbo. (June Berongan)