Metro Cebu naapiki sa supply sa tubig karong adlawa. - MCWD

Nagkalapad pa ang epekto sa pagkapakgang sa supply sa tubig dinhi sa sugbo karong adlawa. Sukad pa kaganinang buntag nagpusot-pusot ang mga nadawat nga reklamo sa DYAB Abante pa Bisaya labot sa paghinay ngadto sa pagkawa gyuy agas sa tubig sa pipila ka bahin sa Dakbayan sa Sugbo ug sa Dakbayan sa Mandaue. Ang Metro Cebu Water District MCWD, nipasabot nga adunay nasugatan nga kakulian ang ilang mga sakop nga nagpahigayon ug service maintenance sa mga tubo kagabie. Matod sa MCWD nga aduna silay gipahigayon nga service maintenance sa mga tubo nila kagabie sa Dakbayan sa Mandaue. Apan suma pa sa MCWD nga adunay problemang teknikal nga nasugatan ang maintenance team sa ilang main pipe. Gipasalig sa MCWD nga gihimo nila ang tanan karong higayona nga mapadali ang pag-atiman sa problema sanglit nagkalapad pa ang epekto sa pagkapakgang sa supply sa tubig nga nasinati na karon sa pipila ka lungsod sa amihanang bahin sa Probinsya sa Sugbo.   ( Najib M. Cubio )