"Journalists on Facebook" Page Gilusad

Gilusad sa Facebook ang usa ka pahina (Page) nga motabang sa mga tigbalita paggamit sa social network.

Sa iyang blog post, gipasabot ni Justin Osofsky, Director of Media Partnership sa Facebook nga ang Journalist on Facebook page magamit sa mga tigbalita isip reporting tool aron mas sayon ang pagpadangat niini og kasayoran ngadto sa katawhan.

Matud ni Osofsky, ang bag-ong page maoy ilang tubag sa nagkadaghang mga tigbalita nga migamit sa Facebook pagpangita og mga tinubdan lakip na ang pagpanubag ngadto sa katawhan.

Motakda unya ang Facebook og panagtagbo tali sa mga journalists nga himoon pinaagi sa workshops aron hingpit nga magamit ang Journalists on Facebook isip reporting tool. Ang Facebook misugod sa ilang pakig-alayon sa mga journalists sukad sa miaging tuig.

Hangtod karong adlawa, aduna nay 15,242 likes ang page. Lakip sa mi-like sa page ang mga sikat nga tigbalita sama nila ni CBS television news anchor Katie Couric, ABC evening news anchor Diane Sawyer ug ABC Sunday talk show host Christiane Amanpour, kinsa kanhi anchor sa CNN. (juntariman)